Son həftələr Azərbaycanda limon kəskin bahalaşıb. İndi paytaxt Bakının bazar və marketlərində bir kiloqram limon ortalama 6- 9 manat arasında təklif edilir.
Paytaxt sakinlərinin sözlərinə görə, əslində Azərbaycanda limon apreldən bahalaşmağa başlayıb. Onların sözlərinə görə, apreldə kiloqramı ortalama 2 manat 50 qəpiyə olan limon 3 manat 50 qəpiyə qədər yüksəlib. Paytaxt sakinlərinin vurğulamasına görə, son həftələrdəki qiymət artımı ilə isə yaxın tarixdə heç vaxt rastlaşmayıblar. Onlar deyiblər ki, bir neçə həftə əvvəl onlara 3 ədədi 1 manata təklif edilən limonların bir ədədi azı 80 qəpiyə yüksəlib.
"İndi bir ədədi 80 qəpiyə təklif edilən limonlar ən ucuz limondur. Eləsinin var bir ədədi 1 manata, 1 manat 50 qəpiyə satılır", - adının çəkilməsini istəməyən bir paytaxt sakini AzadlıqRadiosuna vurğulayıb.
Bakının "3-cü mikrorayon" deyilən ərazisindəki bazarda isə limonun bahalaşmasının səbəbi ilə bağlı suala satıcılardan biri belə cavab verib: "Hər şey bahalaşıb da. Siz limondan niyə yapışmışınız. Ötən il kiloqramı 3 manata olan gilas indi 9 manata satılır. Ondan da danışın da. Bu il məhsul azdır".
Cənub rayonlarında...
Subtropik meyvələr Azərbaycanın, əsasən, cənub rayonunda becərilir. Astara rayon sakinləri də AzadlıqRadiosuna deyiblər ki, indi onların bazarlarında da bir ədədi 50 qəpikdən ucuz limon tapmaq mümkün deyil.
Astara rayonunda adının çəkilməsini istəməyən bir fermer limonun bahalaşmasını belə izah edib: "Bu, daha çox mövsümlə bağlıdır, bu aylar limon tükənir. Yeni məhsul hələ yetişməyib. İlin bu fəsli limon bahalaşır. Bir də, üstəlik, ötən il Azərbaycanda limonun məhsuldarlığı yüksək olmadı. Ona görə də indi məhsul qıtlığı var".
Səbəb nə ola bilər?
Məsələyə rəsmi qurumlardan münasibət almaq mümkün olmayıb. Müstəqil iqtisadçılar isə hesab edirlər ki, qiymət artımının əsas səbəbi yerli limon ehtiyatlarının tükənməsi və Türkiyədən idxal olunan məhsulun bahalaşmasıdır. Onların sözlərinə görə, Azərbaycanda limon istehsal olunsa da, bu, daxili tələbatı tam ödəyə bilmir. Üstəlik, mövsüm zamanı yerli limonun bir hissəsinin Rusiya və digər ölkələrə ixrac edildiyi bildirilir.