Bu gün, iyulun 1-də Ali Məhkəmə Qarabağ müharibəsi veteranı, Azərbaycanın Ləyaqətli Övladlarının Vəhdəti (ALÖV) Partiyasının sədri Rza Səfərsoy haqqında çıxarılmış hökmü təsdiq edib.
R.Səfərsoy ötən il dekabrın 11-də Xəzər rayon Məhkəməsinin qərarı ilə 2 il 9 ay həbs cəzası alıb. O, Cinayət Məcəlləsinin 228.1-ci maddəsi ilə - qanunsuz silah saxlamaqda təqsirli sayılıb. İddia olunur ki, 2023-cü il noyabrın 23-də onun evindəki axtarışda "TT" markalı silah tapılıb.
"Çoxsaylı pozuntular var"
İyulun 1-də hakim Ələsgər Novruzovun sədrliyi ilə keçən prosesdə R.Səfərsoy deyib ki, hökm sifarişlidir: "Çoxsaylı pozuntular var, apellyasiyada da demişəm, əhəmiyyət verilməyib. Pozuntular var. Hal şahidlərindən biri, ümumiyyətlə, ifadəsindən imtina edib. Silahın götürülməsi, qablaşdırılması haqda akt yoxdur. Tutulanda həyat yoldaşımı döyürdülər, ona görə imzalamışam. Evdə axtarış aparılmasına icazə ərizəsi arxa tarixə yazılıb. Bu da saxtalığını göstərir".
O, həbsi ilə bağlı sifarişin prezidentdən gəldiyini söyləyib: "Birbaşa İlham Əliyevdir mənimlə bağlı sifarişi verən. İkinci qrup müharibə əliliyəm".
Müdafiə tərəfi işə bəraətverici əsaslarla xitam verilməsini istəyib. Amma onların istəyi gerçəkləşməyib.
R.Səfərsoyun məhkəmədə səsləndirdiyi fikirlərə Prezident Administrasiyası və başqa rəsmi qurumların münasibəti bəlli deyil. Amma rəsmilər, bir qayda olaraq, ölkədə sifarişli həbslər, habelə saxlanan şəxslərə və onların yaxınlarına basqılarla bağlı deyilənləri qəbul etmirlər.
Xatırlatma
R.Səfərsoy bundan əvvəl 2018-ci ildə də Facebook səhifəsində Gəncənin keçmiş icra başçısı Elmar Vəliyevə (yaralanmışdı, səhhəti ilə bağlı işdən çıxarıldı) atılan güllələr barədə yazdığı fikirlərinə görə həbs olunmuş və o zaman Cinayət Məcəlləsinin 214-2-ci (terrorçuluğa açıq çağırışlar) və 281.1-ci (dövlət əleyhinə açıq çağırışlar etmə və ya bu məzmunlu materiallar yayma) maddələri ilə 2 il azadlıqdan məhrum edilmişdi. Bakı Apellyasiya Məhkəməsi onun cəzasını 7 ay 2 günə endirmiş, bu müddəti də çəkdiyinə görə onu məhkəmə zalındaca azadlığa buraxmışdı. R.Səfərsoy o vaxt da özünü təqsirli bilməyib.
Hökumət təmsilçiləri Azərbaycanda heç kimin siyasi mövqeyinə görə cəzalandırılmadığını, həbs olunanların konkret faktlarla tutulduğunu bildirir.
ALÖV Partiyası dövlət qeydiyyatına alınmayıb.
E.Vəliyevə sui-qəsddə günahlandırılan Yunis Səfərov isə ömürlük azadlıqdan məhrum edilib.
